Reykjanes maraþon 2014 - á eftir bolta... kemur hlaupakona!

Logn í Keflavík?   Hættu nú alveg.   

Við hjónin höfum alltaf tekið þátt í Reykjanes maraþoninu þegar við höfum getað, enda Keflavík heimabær betri helmingsins og okkur rennur blóðið til skyldunnar.  Oftar en ekki kemur tengdapabbi með okkur og ekki er það verra ef okkur gengur vel í hans heimabæ, þá er hann alveg rígmontinn af okkur og skilur ekkert í því að sjónvarpið er ekki á staðnum.  

Ég tók þetta hlaup inn í miðja æfingaviku, hélt mínu striki og hvíldi ekki sérstaklega fyrir það, frekar en Fossvogshlaupið.  Samkvæmt mínum útreikningum (og McMillans...) þá átti ég að geta vel ráðið við 4:04 pace í 10 km á svipuðu efforti og í RM og Fossvogi, markmið dagsins 40:40.

Við Þórólfur vorum komin snemma til að ná í númer og græja okkur.  Það var töluverð rigning á leiðinni en um leið og við komum í bæinn stytti upp og brast á með bongó blíðu, þ.e. þurrt, 12 stiga hiti og nánast logn!  Stefán og co. voru mættir, sem sagt allt eins og best verður á kosið og mikil stemmning á ráslínu.

Hlaupið gekk bara eins og í lygasögu en hér er kort af hlaupaleiðinni.  Fyrsta km er hlaupið frá Hótel Keflavík, niður að höfninni og upp brekku hinu megin.  Var nákvæmlega á pace-i fyrsta km og sá í skottið á Stefáni.  Á þriðja km var ég komin í hælana á honum og hann leiddi mig svo bara í gegnum næstu 4-5 km eins og engill.  

Á sjöunda km sáum við fótbolta rúlla eftir miðri götunni og bílarnir stopp.  Hlaupararnir létu það að sjálfsögðu ekki trufla sig... nema ég, sem stóðst ekki mátið að leika mér smá, hljóp á eftir boltanum og náði góðri neglu og boltinn í höfn.  

Á áttunda km varð Stefán helst til of vinstri sinnaður fyrir minn smekk, þveraði götuna sem mér fannst nú alveg óþarfi þar sem ég þekkti brautina og vissi af hægri beygju framundan.  Ég hafði Klemenz og Gunnar í sigtinu en við Stefán höfðum nálgast þá hægt og bítandi allt hlaupið og það hjálpaði við að halda hraða upp brekkuna á 8. km.  

Stefán rúllaði fram úr þeim þegar hér var komið við sögu og var komin með gott forskot áður en við vissum af.  Ég hélt mínum hraða, náði í skottið á strákunum og við vorum öll á góðu rúlli niður 9 km. Á síðasta km gáfu strákarnir aftur aðeins í og náðu smá forskoti, ekkert lufs á lokasprettinum takk.  Svo gott að sjá gosbrunninn og síðustu beygjuna og ekki skemmdi fyrir að heyra í litlu skottunum mínum hvetja síðustu metrana: 'Áfram mamma, áfram mamma, komaso...?.

Hoppandi glöð með lokatímann 40:32 en það er besti tíminn minn í 10 km í rúm tvö ár og 4. besti tíminn minn frá upphafi.   Þórólfur sigraði á tímanum 35:55, hrikalega flott eftir tveggja vikna meiðsla hvíld.   Við vorum leyst út með glæsilegum vinningum, hlaupahanskar, hótelgisting á Hótel Keflavík, Ritzenhoff kerti og svo bættust tvær dollur í safnið.  Alltaf best þegar báðum gengur vel :)

Svona hljóp ég þetta í gær:

Split	Time	Distance	Avg Pace
Summary	40:34.6	10,00	4:03
1	4:04.5	1,00	4:05
2	4:01.7	1,00	4:02
3	4:05.1	1,00	4:05
4	4:02.7	1,00	4:03
5	4:02.0	1,00	4:02
6	4:07.4	1,00	4:07
7	4:01.2	1,00	4:01
8	4:03.7	1,00	4:04
9	4:02.4	1,00	4:02
10	4:03.8	1,00	4:03

Maður verður svo svakalega glaður eitthvað þegar allt gengur svona upp og þykir svo ofsalega vænt um hlaupafélagana og eiginlega bara alla, endorfínið...mmm...  Við fjögur fræknu, Stefán, Gunnar, Klemenz og ég, gátum ekki hætt að brosa eftir dagsverkið og þakka hvort öðru fyrir samvinnuna.  Ég reyndi svo hvað ég gat að plata þá til Eyja um helgina, er náttúrulega alveg ómöguleg ef ég þarf að hlaupa ALEIN þar...!!!

Fossvogshlaupið 2014

Ég hef ekki tekið þátt í Fossvogshlaupinu áður og var spennt að prófa ef kroppurinn leyfði eftir RM.  Var í fínu standi og ekkert eftir mig og þá var bara að láta vaða.  Valdi 5 km því það passaði best inn í prógrammið mitt.

Var nú ekki lítið ánægð að sjá að hann Stefán var búin að skrá sig í 10 km en þá er 5 km brautin hlaupin tvisvar.  Fullkomið þar sem hann er aðeins hraðari en ég núna og í þetta sinn var ég viss um að við gætum fylgst að.  

Æfingin sem ég skipti út fyrir hlaupið samanstóð af þremur köflum á T hraða (4.04 pace hjá mér) samtals 30 mínútur.  Ég gaf mér þá að það væri í lagi að fara aðeins hraðar fyrst þetta var bara 2/3 af tímanum...   og stefndi rétt undir 20 mínúturnar en bara ef ég gæti það með því að hlaupa yfirvegað og án þess að streða. 

Frábært veður sem við fengum, stillt og hlýtt.  Öll umgjörð í kringum hlaupið til fyrirmyndar, mikil stemmning á staðnum og rétt um 450 manns skráðir.  

Brautin er skemmtileg og krefjandi.  Fyrst er hlaupið 1,8 km inn Fossvogsdalinn en þar er tekin U-beygja í brekku.  Hlaupið niður aftur og upp brekku hinu megin í dalnum og til baka í átt að Víkingsheimilinu.  Síðasta km er nokkuð krefjandi brekka upp í áttina að Kópavogi og svo brött brekka niður aftur í átt að Víkingsheimilinu, krækt fyrir hornið og 200 m í mark.

Svona hljóp ég þetta:

Split	Time	Distance	Avg Pace
Summary	19:45.0	5,02	3:56
1	3:54.3	1,00	3:54
2	3:53.8	1,00	3:54
3	4:02.7	1,00	4:03
4	3:56.3	1,00	3:56
5	3:53.2	1,00	3:53
6	:04.7	0,02	3:24

Lokatími: 19:44 og önnur kona. Hér eru úrslitin.

Við vorum 3 Gunna Palla stelpur sem röðuðum okkur í fystu þrjú sætin:

Eva, María og Anna.

Verðlaunin voru glæsileg eins og allt annað hjá Víkingunum.  Fyrir annað sætið fékk ég verðlaunapening, litla tösku fulla af Hleðslu og 12.000 kr gjafakort hjá Intersport/Byko/Elko, vúhúúú...

p.s. Frekar fyndið að hugsa um það að María er 24 árum yngri en ég og Anna 22 árum yngri :)

Rokkað feitt í RM 2014

Ég hef yfirlett ekki verið að rokka feitt í Reykjavíkurmaraþoni, þ.e. fyrir utan árið 2005 þegar ég hljóp heilt maraþon, það gekk vel.  Miklu oftar hefur þetta verið bölvað basl, ég hef sprungið, streðað, ekki náð markmiðum og er einhvern veginn aldrei í mínu besta standi á þessum árstíma.  Eins og sumrin eru skemmtileg með frítíma og ógrynni af keppnishlaupum þá blómstra ég í rútínunni.  Skemmtilegasta RM hlaupið mitt hingað til fyrir utan maraþonið var í fyrra en þá fór ég 10 km á þrjóskunni, 6 vikum eftir fótbrot, bara til að geta verið með í að safna fyrir hana Ágústu Vá-gústu.

Í ár var planið að hlaupa hálft maraþon sem hluta af undirbúningi fyrir hálfa maraþonið í Munchen í október.  Ég á best 1:29:40 frá því 2009 og markmiðið er klárlega að bæta þann tíma í Munchen.  Markmiðið fyrir RM var að hlaupa á sub 1:30 (hef ekki gert það síðan 2010) eða á ca. 4:15 pace, vonandi án þess að taka of mikið úr mér sem myndi trufla prógrammið.

Viku fyrir hlaup heyrði ég í honum Stefáni félaga mínum, hann ætlaði út á 4:10.  Kemurðu ekki bara með?  Ohhhh svo freistandi!   Var eiginlega alveg komin á það en sem betur fer hitti ég Gunna Palla, þjálfara í Höllinni á Expó-inu og hann kippti mér til baka.  'Farðu út á 4:15 og haltu því alla vega fyrstu 14 km, eftir það máttu auka í...'  

Ég vandaði undirbúninginn að öllu leyti og leit á það sem generalprufu fyrir Munchen.  Lax á Grillmarkaðnum í hádeginu á föstudaginn, léttur kvöldmatur og ís á eftir.  Fór snemma að sofa og vaknaði rétt fyrir sex til að borða hafragrautinn minn og hálfa ristaða beyglu með sultu og osti.  Vatn og kaffi, sturta og í keppnisdressið.  Nógur tími til að slaka á og lesa blöðin í huggulegheitum.  Ég hjólaði niðrí bæ sem var ágætis upphitun, kom dótinu mínu fyrir og skokkaði svo hringinn í kringum Tjörnina.
  

Ég þekki náttúrulega ALLA á svæðinu, stemmningin er einstök og maður getur ekki annað en brosað allan hringinn.  Ég fór meðvitað rólega af stað og naut þess að horfa í kringum mig og drekka í mig upplifunina.  Fyrsti km var hægastur hjá mér, ja fyrir utan þann 4. en ástæðan fyrir því er að ég tók gel rétt áður en við komum að fyrstu drykkjarstöðinni og ég vildi fá vatn en ekki orku.  Á fremstu borðunum var bara orka og ég spyr starfsmanninn hvort það sé ekki vatn líka.  Hann vísar mér þá yfir götuna en það voru drykkjastöðvar báðu megin.  Ég þurfti að skáskjótast á milli hlauparanna þvert yfir brautina og svo aftur til baka.  Sá svo að ég hefði ekki þurft þess, það var vatn og orka báðu megin... vatnið bara aðeins lengra frá.

Eftir drykkjarstöðina og búin að missa af grúppunni minni.

Tók mér góðan tíma eða næstu tvo km í að koma mér aftur á minn stað og vinna upp þessar sek sem ég missti, var pollróleg og hægt og örugglega náði ég þeim hlaupurum sem náðu forskoti á drykkjarstöðinni.

Komin aftur á minn stað.

Eftir 8 km var ég komin í hælana á Þóri og Pétri sem voru að hlaupa heilt maraþon og datt í þennan fína takt með þeim.  Við fórum í gegnum 10 km á 42:52 sem var aðein hægar en ég hafði lagt upp með, ætlaði að vera á 42:30 til að ná undir 1:30.  Hmmm... hér þurfti ég að taka ákvörðun um hvort ég ætti að auka í og fara á undan strákunum eða láta bara ráðast með tímann og njóta samfylgdarinnar.  Það er skemmst frá því að segja að ég var ekki lengi að velja síðari kostinn.  Það er ótrúlega gott að þurfa ekkert að hugsa, bara láta sig fljóta með og ég treysti því fullkomlega að þeir myndu passa pace-ið fyrri hlutann af maraþoninu sínu.  

Tættum í okkur km enn af öðrum, frábær líðan og allt gott í heiminum.  Tók annað gel við drykkjarstöðina á Kirkjusandi og fékk mér vatn þar, annars fékk ég mér orku á hinum stöðvunum.  Gott rúll upp brekkurnar af Eimskipasvæðinu og frábært að komast upp á Sæbraut, engar fleiri brekkur.  Við höfðum fengið góðan meðvind út eftir sem þýddi þá að síðustu 4-5 km voru í mótvindi, ekki miklum en maður fann alveg fyrir honum.  Langaði ekkert til að yfirgefa mína menn og gerði það bara ekkert, þrátt fyrir hvatningu.  

Leiðir urðu nú samt að skilja, það var óumflýjanlegt og strákarnir þurftu að beygja til vinstri upp Kringlumýrarbrautina.  Þórir jók aðeins hraðann síðasta km áður og hvatti mig til að klára þetta almennilega.  Ég hafði 3 km laga stöðu mála og freistast til að ná markmiðinu.  Á þessum síðasta kafla skiptust á hugsanir um að pressa vel eða bara finna annað skjól og rúlla...   Þegar einn og hálfur km var eftir sá ég vel í næstu konu á undan og nú var kollurinn komin í lag og gamla setti í fimmta gír.  Síðasti km var sá hraðasti á 4:05 pace.  Ég sá klukkuna í fjarska, pírði augun... 1:29:11 og kannski 150 m eftir, ég næ þessu!   Hljóp síðustu 250 m á 3:40 pace, 4. kona í mark af 1001 sem tóku þátt og 3. íslenska konan.

Endaspretturinn Ljósm: Jón Kristinn Haraldsson

Í RM eru verðlaun annars vegar fyrir fyrstu þrjá og svo fystu þrjá Íslendinga í hverri vegalengd, kellan á palli og aur í verðlaun, vííí...  Hér eru úrslitin.  Sveitin mín var svo í öðru sæti í sveitakeppninni af 36 sveitum og fysta sem skipuð var Íslendingum.

Mynd af síðu Reykjavíkurmaraþons, fyrstu 3 íslenku konurnar í hálfu maraþoni.

Helen, Anna Berglind og Eva.

Ég er alveg hrikalega ánægð með þetta hlaup að öllu leyti og nú verður gaman að halda áfram að leggja í bankann fyrir Munchen.  Ef allt gengur að óskum næstu vikurnar verður farið út á 4:10 pace þar, segi ég og skrifa!  

Greining fyrir hlaupanörda, hljóp á negative splitti, rúmri mínútu hraðari með seinni helminginn.

Fyrstu 10 km:  42:52

Seinni 10 km:  41:51, sem er aðeins hraðar en ég hljóp 10 km á Selfossi.

1,26 km: 5:03

Split	Time	Distance	Avg Pace
Summary	1:29:46.9	21,26	4:13
1	4:19.0	1,00	4:19
2	4:11.8	1,00	4:12
3	4:15.9	1,00	4:16
4	4:22.8	1,00	4:23
5	4:13.8	1,00	4:14
6	4:15.9	1,00	4:16
7	4:10.0	1,00	4:10
8	4:14.4	1,00	4:14
9	4:10.6	1,00	4:11
10	4:14.2	1,00	4:14
11	4:11.4	1,00	4:11
12	4:16.6	1,00	4:17
13	4:14.6	1,00	4:15
14	4:13.2	1,00	4:13
15	4:12.2	1,00	4:12
16	4:16.1	1,00	4:16
17	4:16.7	1,00	4:17
18	4:10.0	1,00	4:10
19	4:07.1	1,00	4:07
20	4:17.4	1,00	4:17
21	4:05.0	1,00	4:05
22	:58.2	0,26	3:42